Вечерва, во 18 часот, во домот на АРМ во Струмица ќе се одржи првата сесија на Граѓанскиот буџетски форум во организација на општината и Центарот на заедницата.
Граѓаните кои ќе присуствуваат на форумската сесија, ќе имаат можност да ги проследат планираните програми и проекти за 2017 година, да дискутираат по нив, но и да предлагаат свои проекти во рамките на програмите, велат организаторите.
– Станува збор за осум програми, и тоа: Улици и патишта, Локален економски развој, Уредување рурални подрачја, Образование, Социјална заштита, Уредување градежно земјиште, Култура и Спорт. Покрај тоа, ќе биде извршена презентација на досегашното извршување на буџетот за 2016 година, како и презентација на Развојните програми како дел од предлог буџетот за 2017 година, вели Кирил Парталов, секретар на Општина Струмица.
Струмица, според локалните власти, е прва Општина во државата која го практикува партиципативното носење на буџетот, во кое главен збор имаат граѓаните и нивните предлози за реализација на проекти кои се од витално значење за развојот на општината и подобрување на квалитетот на нивното живеење.
-Граѓанските буџетски форуми во општина Струмица се одржуваат веќе петта година, а пред тоа, Општината секоја година одржуваше јавни собири во сите месни и урбани заедници, додаде Парталов.