Во организација на Општинскиот совет за безбедност во сообраќајот на патиштата денеска на пладне со дефиле по булеварот „Маршал Тито“ во Струмица беше оддадена почит и сеќавање на жртвите од сообраќајните несреќи.
Во дефилето учествуваа ученици од основните и средните училишта, јавните претпријатија, како и членови на повеќе невладини оргранизации и институции.
– Со денешното сообраќајно дефиле, сакаме да му дадеме внимание на секој учесник во сообраќајот, посебно на децата. Се надевам дека сите учесници во сообраќајот ќе се присетат на жртвите во сообраќајните несреќи и оти она застанување на семафорите од дваесетина секунди значи дека треба да внимаваат на себе и на животите на останатите учесници, рече Зоран Узунов,претседател на Општинскиот одбор за безбедност на патиштата-Струмица.
Според податоците од Секторот за внатрешни работи, во општина Струмица од први јануари до 30-ти јуни годинава се случиле 115 сообраќајни несреќи, од кои 42 со тешки последици. Нема загинати, потешко биле повредени девет лица, а 53 полесно.Причинетата материјална штета изнесува 8.287.000 денари.