Во централното градско подрачје во Штип се пребројуваат паркинг местата во централното градско подрачје со цел да се среди сообраќајниот хаос. Директорот на ЈП „Стипион 2011“, Тони Јовев вели дека веќе се обележани 120 паркинг места на улицата „Ванчо Прќе“ на потегот од стоковната куќа „Нама“ до местото викано „Огледало“.
– Наплатата на паркинг местата нема да ја реализираме во текот на годинава, но заради пребројување и наша анализа апелираме жителите на улицата „Ванчо Прќе“ да се пријават кај нас, заради евиденција, колку можеме да им издадеме месечни паркинг места, рече Јовев.
Тој истакна дека во текот на наредниот период ќе се обележат и останатите паркинг места во центарот, а по изградбата на платформите над река Отиња и ќе стартува наплатата на паркинг местата во Штип.