Во Штип денеска свечено беше отворен Зоолошкиот парк Брион. Директорот на ЈП „Исар“, Ангел Бојаџиев информира дека за неполн месец го уредиле паркот, во кој веќе престојуваат и првите животни.
– ЗОО паркот е на површина од 5.000 метри квадратни, за хигиената ќе се грижат вработените на ЈП Исар. Животните се донирани од бизнис секторот, а со ветеринарната станица веќе имаме склучено договор за да се грижи за нивната здравствена состојба. Во ЗОО паркот во моментот имаме 20 живеалишта, првите животни кои се вселени овде се елените, срните, дива коза, пауни, пони коњче, дива свиња и други разни птици, вели Бојаџиев.
Градоначалникот на Општина Штип, Илчо Захариев вели дека овој ЗОО парк засега е единствен во источна Македонија, а очекува штипското комунално претпријатие да ги проширува живеалиштата со други животни. До Нова година влезот во ЗОО паркот во Штип е бесплатен.