Во Инфективното одделение во Клиничка болница-Штип хоспитализирани се 11 пациенти со симптоми на жолтица. Инфектологот Глорија Караѓозова изјавидека кај четворица пациенти веќе е докажано дека имаат хепатит од типот А.
– Хепатит А е сезонско заболување и покрај тоа што ние го очекуваме во есен или зима, но сега во август, токму во летниот период се појави. Моменталната состојба е 11 пациенти кои се хоспитализирани од кои што докажани значи со изолати хепатит А се четири пациенти, истакна Караѓозова.
Таа додава дека хоспитализираните пациенти се од Штип, сите се на различна возраст, од кои најмалиот пациент има пет, а најстариот над 30 години. Пациентите се од различни делови на градот и немаат никава пријателска или пак семејна поврзаност. По четирите потврдени и седумте сомнителни сомнителни случаи инфектолозите апелираат граѓаните да ја зголемат хигиената на овие летни горештини, но и да внимаваат на храната, овошјето и зеленчукот кои ги консумираат.
Засега изворот на заразата од жолтица во Штип е непознат, по што надлежните институции и епидемиолозите ќе треба во текот на овие денови да го откријат жариштето на болеста.