Голем дефект на главната водоводна линија ги остави штипските населби во високите зони без вода за пиење. Според директорот на ЈП „Исар“, Никола Мицевски дефектот е лоциран меѓу Филтер станицата и штипската населба „Дузлак“, а екипи веќе работат на негово санирање.
-Нашите екипи пристапија на отварање на дефектот и во текот на денот се надеваме дека ќе успееме да го санираме овој проблем. Се надевам дека до утре во текот на претпладневните часови ќе имаме нормализирано водоснабдување. Водоснабдувањето е пренасочено кон ниските зони и вода за пиење ќе немаат населбите познати како Блоковите 85, 91 и 2000 и високите зони како што е населбата Пребег, вели Мицевски.
Тој истакна дека оваа година ова е еден од посериозните дефекти на главната водоводна линија, а според анализите над 30% од граѓаните во Штип ќе останат без вода се до санирање на дефектот. Мицевски апелира граѓаните во ниските зони, кои имаат вода рационално да ја користат.