Во Штип денеска и официјално се формираше Мултисекторскиот тим за насилство врз жените и девојчињата, а кој е дел од проектот „Веведување на интегративен пристап на пакетот од суштински услуги за жени и девојки жртви на насилство“. Проектот го реализира НВО „ЕХО“ од Штип.
Бети Пеева од НВО „ЕХО“-Штип вели дека тимот е составен од претставници на полицијата, судот, обвинителството, Клиничка блолница, Здравствен дом-Штип, потоа од Општина Штип и од адвокати и судии кои се експерти во оваа област.
-Овој модел со кој што ние ќе работиме ни се наметнува всушност со ратификација на конвенцијата на Советот на Европа за заштита од насилство на жените и девојчињата, односно популарно наречената Истанбулска конвенција, вели Пеева.
Токму со ратификацијата на оваа конвенција кон крајот на 2017 година, како што рече Пеева на Македонија и претстојат и големи предизвици на ова поле, бидејќи се наметнуваат одредени норми и стандарди, кои треба да се вметнат во македоинските закони. Инаку Штип и Струмица се пилот општини во овој проект, каде што се формирани и вакви тимови.
-Овие тимови ќе имаат навистина тешка задача. Затоа што ќе треба да работат на донесување на препораки за промени во законската регулатива во начините и моделите кои што сега постојат, во меѓуинституционалната соработка, а кои што досега и не функционираа. Сето тоа на некој начин ќе треба да се сублимира да се доставува до повисоките инстанци за да може да се вметне во нова законска реулатива и како препораки да влезат во некои измени, нови законски решенија, рече Пеева.
Со тимот во Штип ќе координираат членовите на НВО „Ехо“, а во Струмица Здружението на Организација на жени.