Хидросистемот „Злетовица“ го подготвува цевководот и системот за дистрибуција на водата до штипската Филтер станица од наредната седмица, соопшти Миле Моневски од Хидросистемот (ХС) „Злетовица“ на денешната трибина „Обезбедување квалитетна вода за пиење, канализација и одвод на отпадни води“ во организација на НВО „Медиа плус“ – Штип.
„Граѓаните на Општина Штип сѐ уште отплаќаат кредит за адаптација на филтер станицата во Штип и затоа наш интерес е тие пари коишто Општина Штип и државата ги вложиле, и коишто сѐ уште ги плаќаат граѓаните, да бидат ставени во функција.
Конечна цел е граѓаните да пијат чиста, здрава и исправна вода и да имаат поевтини сметки за вода.
Тоа е интересот на Општината којшто сакаме да го заштитиме, но најважно од сѐ ни е здравјето на граѓаните. Сѐ додека не дојдеме до квалитетна вода за пиење, ние нема да ја пуштиме во употреба оваа вода.
Затоа јас побарав, заедно со Влада на РМ, да направиме уште едно испитување, за да видиме во каква состојба е водата, дали можеме да ја прочистуваме, колку ќе чини прочистувањето на таа вода и на крај да ги направиме пресметките и анализите за да процениме дали ќе ја преземаме оваа вода.
Водата се тестира во Центар за јавно здравје. Тоа е државна институција, тука нема простор за импровизации. Ќе се тестира водата што излегува од филтер станицата во Штип. Само доколку го има потребниот квалитет, оваа вода ќе биде пуштена до граѓаните“, рече градоначалникот на Штип, Благој Бочварски.