Градоначалникот на Штип, Благој Бочварски, преку прес конференција ги повика граѓаните на дисциплина и одговорност за заштита од коронавирусот, откако во градот се појавија четири нови случаи на Ковид-19.
„Општина Штип оствари комуникација со Министерството за здравство, со неколку сопственици на текстилни фабрики, со здружението за заштита на работничките права „Гласен текстилец“, Клиничка Болница Штип и Центар за јавно здравје и нашите капацитети се насочени кон заштита на здравјето на граѓаните.
Според денешните податоци од Центар за јавно здравје на територија на Општина Штип има 4 нови позитивни случаеви од кои 2 се од истата текстилна компанија“, рече градоначалникот Бочварски.
Тој вели дека волонтери биле испратени пред конфекциите да делат заштитни маски на текстилните работници.
„Волонтерите досега имаат извршено услуги на вкупно 258 стари и изнемоштени лица и апелираме тие да продолжат да ги користат нашите услуги и да се заштитат самите себе“, вели Бочварски.
Градоначалникот вели дека е задоволен од дисциплината на своите сограѓани, но дека е потребна целосна вклученост на граѓаните, работниците, сопствениците и институциите во борбата со вирусот за кој се уште нема лек ниту вакцина.