Ноќеска, еден час по полноќ избувнал пожар во основното училиште „Кочо Рацин“ во селото Долно Српци, општина Могила.
Според првичните информации пожарот почнал во подкровната конструкција и ја зафатил целата зграда на училиштето која изгорела до темел и покрај навременета интервенција на пожарникарските екипи.
– Ова училиште е или беше едно од поубавите во нашата општина. Го реновиравме во 2006 година, но за жал пожарот однесе се. Училиштето изгоре до темел. Пристигнав веднаш по дојавата за пожарот, но за жал неможевме ништо да направиме. Локалната самоуправа во целост ќе помогне во ова училиште повторно да се изведува настава, изјави градоначалникот на општина Могила, Славко Велевски.
Во основното училиште „Кочо Рацин“ во село Долно Српци учат 65 деца кои се очекува наставата да ја продолжат во училиштето што се наоѓа во блиското село Ивањевци.