Во просториите на ПЕ на Министерството за земјоделство, шумарство и водостопанство во Велес во тек е делење на времените дозволи за движење за земјоделците до нивните земјоделските стопанства како оранжерии, пластеници и сточарски објекти, поради воведување на нов продолжен полициски час за време на викендот. Со овие времени дозволи опфатени се 28 земјоделци од Велес и велешкиот поширок регион во кој се вклучени и Општините Градско и Чашка, информира за МИА, Зоран Наковски раководител на ПЕ на МЗШВ во Велес.
-Со времените дозволи ќе им се овозможи на земјоделците движење во време на полициски час од 16:00 до 5:00 наутро, според нивните потреби. Затоа на секој поединечно во времената дозвола која ја добиваат, му е наведено до колку часот секој од нив има дозвола за движење за време на продолжениот полициски час, појасни Наковски.
– Со овие времени дозволи од МЗШВ ќе им се овозможи на овие земјоделци непречено да отидат на работа во своите пластеници и стакленици под раноградинарски култури, а тука се и сточарите на кои со овие дозволи ќе им се овозможи непречен пристап до свињарските фарми и трла на одгледувачите на овци, информира Наковски.