Со воена свеченост во касарната „Боро Менков“ во Куманово денеска беа одбележани 26 години од формирањето на АРМ.
На присутните им се обрати заменик-началникот на штабот на Здружената оперативна команда, полковник Жикица Јовановски кој се осврна на почетоците на формирањето на Армијата и активностите кои таа ги преземаше низ годините.
– Во наредниот период потребно е да се останеме фокусирани кон исполнување и одржување на високите професионални стандарди, како што се обученоста и извежбаноста на персоналот и единиците за исполнување на уставната обврска, но во истовреме да обезбедиме интероперабилни и борбено способни капацитети за исполнување на проектираните обврски на патот кон полноправно членство во НАТО и ЕУ, рече полковник Јовановски.
Пред присутните беа прочитани телеграмите со честитки, а беа наградени и унапредени припадници на АРМ. Присутните градоначалници на општините од североисточниот регион, од институциите, установите, граѓаните на денешното одбележување на 18-август имаа можност да разгледаат и дел од опремата и вооружувањето со кое располага АРМ.
