Во крводарителска акција под мотото „Биди хуман-дарувај крв” во Кавадарци во текот на денешниот ден се собрани 45 крвни единици.
Во акцијата доброволно даруваа крв членовите од навивачката подгрупа „Ултра кру” која функционира во рамки на навивачката група „Лозари исток” од Кавадарци.
Акцијата беше организирана по повод третиот роденден на подгрупата навивачи, а крв даруваа навивачите во просториите на кавадаречката локална самоуправа.
– Навивачите од нашиот град уште еднаш докажаа дека се хумани и дека организираат хумани активности. Задоволни сме од акцијата, истакна секретарот на Општинската организација на Црвениот крст Кавадарци, Розе Илова.
Таа кажа дека на Црвениот крст и на одделението за трансфузиона медицина при општата болница во Кавадарци им е задоволство што соработуваат со навивачите. Ова е втора година да се организира ваква акција. На Црвениот крст, одделението за трансфузиона медицина и на сите кои денес даруваа крв, претставници на навивачката група им доделија благодарници.