Дежурните медицински тимови од Крива Паланка кои во рамки на проектот на Министерството за здравство вршат превентивни прегледи за заштита од топлотниот бран, досега извршиле над 500 прегледи.
– Во периодот од 10 јули заклучно со 7 август тимовите од Здравствениот дом „Димитар Арсов“ кои дежураат на отворените пунктови во градот извршија 497 превентивни прегледи. Кога ќе ги сумираме бројките со последниот извештај од измината недела, надмината е бројката од 500 преледи. Всушност покрај основните прегледи кои опфаќаат мерење на притисок, гликемија и тежина, на сите граѓани кои го посетуваат пунктот им пружаме совети за заштита од топлотниот бран, изјави главната медицнска сестра Сузана Стаменковска.
Таа нагласи дека пунктот е отворен секој работен ден, како и во деновите од викендот, од 18:30 до 21:30 часот. Покрај препораки за заштита од топлотниот бран, посочи Стаменковска, граѓаните добиваат и упатства за превенција од кардиоваскуларни заболувања.
– Основно кон што треба да се придржуваат е примена на хигиенско-диететски режим на исхрана, да не се изложуваат директно на Сонце во периодот од 10 до 17 часот, да престојуваат во климатизирани и затворени простории, да пијат доволно течности, да не козумираат алкохолни пијалоци и кафе, а храната добро да ја обработат термички пред употреба. Основните симптоми на топлотен удар се изнемоштеност, жед, малаксаност и зашеметеност, рече Стаменковка.
Појасни дека лицето кое ќе ги почувствува тие симптоми треба веднаш да побара сенка или ладна просторија за да се смести, да се напие поголема количина вода, а доколку почувствува болки во стомакот или грчеви во мускулите да побара и сручна медицинска помош.
Инаку, според информациите од службата за Итна медицинска помош при кривопаланечкиот Здравствен дом, изминатата недела е зголемен бројот на пациенти со мозочни удари. Поради тоа се препорачува граѓаните да ги почитуваат препораките од надлежните служби и да се заштитат од топлото време кое негативно се одразува особено на хронично болните, старите лиа и бремените жени.