Во Кочани започна реализацијата на едногодишен проект за воспоставување функционален локален систем за управување и правилно постапување со отпадното ПЕТ пакување.
Носител на активностите е здружението за екологија и заштита на животната средина „Еко Тим Исток“ во партнерство со компанијата „Екопроект-Ко“ од Кочани, а главна цел е подигање на јавната свест за штетното влијание на пластичниот ПЕТ отпад.
Веќе се обезбедени потребните ресурси за селектирање, како и техничка поддршка за собирање и транспорт на отпадот, а ангажманот на вклучените целни групи ќе трае до крајот на август идната година.
– Во проектот се вклучени учениците и наставниците од четирите основни училишта во Кочани, како и неколку угостителски објекти. Тие заеднички ќе се ангажираат на селектирање на ПЕТ амбалажата и предавање на лиценцирана фирма за управување со отпад од пакување, при што собирачите ќе имаат директен финансиски бенефит, а ќе се постигнат еколошки и социјални ефекти, истакна Ирена Мирчовска, координатор на проектот.
Вкупниот буџет на проектот изнесува над 35 илјади долари, при што од Глобалниот еколошки фонд – програма за мали грантови (ГЕФ ПМГ) се добиени 23 илјади долари, а остатокот е сопствено учество на здружението „Еко Тим Исток“ и партнерската компанија.
Правилното управување со отпадот и користењето на бенефитите во Кочани е на незавидно ниво бидејќи кај населението нема навика за селектирање на ПЕТ отпадот, па тој се исфрла со другиот комунален и опасен отпад.