Во Кавадарци се краде вода за пиење, а само во последните пет години во оваа општина се откриени 361 див приклучок, за МИА потврди Ѓорѓи Поп Ицов, директор на Јавното претпријатие “Комуналец” од Кавадарци.
– Проблемот го решаваме на тој начин што на крадците им изрекуваме казна, им пресметуваме потрошени од 100 до 500 кубни метри вода. Им бараме плаќање на такса за приклучок, како и поставување на водомер, појаснува Поп Ицов.
Тој нагласува дека претпријатието, исто така, поднесува и кривични пријави против несовесните кавадарчани, кои на различни начини се обидуваат да крадат од водата за пиење, што до градот се носи педесетина километри од под планината Кожуф.