Стопанската комора на Македонија во Гостивар ја престави новата услуга која се однесува на добивање сертификат за меѓународни возачи. Овој документ е законска обврска и треба да го поседуваат сите возачи кои вршат превоз на патници и стока во меѓународен патен сообраќај.
На прес-конференцијата, претставниците на Стопанска Комора на Македонија, ги појаснија условите за добивање на сертификатот.
– Ние сме овластени да ги вршиме стручните оспособувања на возачите и на управителите на фирмите кои вршат транспорт. На обуките може да се пријават и лица кои во иднина планираат да се занимаваат со превоз во меѓународни патни линии. Тоа се однесува на автобуски товарни превозници, увозно-извозни компании, логистички оператори, царински посредници, трговски компании, производни фирми, туристички агенции, рече Митко Митревски од СКМ.
Митревски потсети дека сертификатот има важност од пет години, а по истекувањето на тој рок возачите повторно мораат да посетат обука и да ја обноват лиценцата.
Стручното оспособување на пријавените кандидати Комората ќе го реализира преку свој овластен Центар, за која цел располага со соодветен стручен кадар, опремени простории и потребни технички и стручни помагала.
Обуките се еднодневни и тие може да се одржуваат во Комората или во простории надвор од неа.