Од издадената 14. емисија на обврзници за денационализација се стекнаа 776 иматели, соопшти Централниот депозитар за хартии од вредност, каде денеска е регистрирана оваа емисија.
Со Четиринаесеттата емисија на обврзници за денационализација во вкупен износ од 9.500.000 евра опфатени се сите правосилни решенија за денационализација од 1 февруари 2014 до 31 јануари 2015 година. Овие обврзници се хартии од вредност кои гласат на име, во ЕВРО валута и се неограничено преносливи. На обврзниците се пресметува камата од 2 отсто на годишно ниво, а номиналната вредност и каматата се отплатуваат во период од 10 години. Исплатата на каматите и номиналните вредности од обврзниците ќе се одвива согласно објавениот Проспект за издавање и тргување на Четиринаесетта емисија на обврзници за денационализација од страна на Министерството за финансии на Република Македонија.
Централниот депозитар за хартии од вредност АД Скопје денеска изврши пресметка на доспеаните камати и рати од обврзниците за денационализација од Четврта до Тринаесетта емисија. Пресметката е направена согласно Проспектите за обврзниците за денационализација објавени од страна на Министерството за финансии на Република Македонија.
Исплатата на ратите и каматите ја врши Министерството за финансии. Исплатите се вршат на банковната сметка регистрирана на личната сметка на имателот на хартиите од вредност во Депозитарот.
Физичките лица – иметели на обврзници за денационализација кои досега немаат регистрирано банковна сметка во Депозитарот, за да се стекнат со паричните средства од доспеаните рати и камати, треба да се обратат и дадат овластување на некоја од деловните банки во Република Македонија.