Во Брисел нема договор, разговорите се уште траат. Лидерот на СДСМ Зоран Заев инсистирал доколку се одржат изборите најдоцна до 26 април, тогаш мора да се формира преодна влада која нема да биде со пократок мандат од шест месеци. Никола Груевски пак сакал преодната влада да се формира што е можно подоцна, по можност кон крајот на годинава.
Доколку не се исполнат барањата за формирање на техничка влада во која нема да биде Груевски, Заев јасно кажал дека ќе го напушти Брисел и нема да продолжи со преговорите. Брисел пак инсистира да има договор вечерва и ги правел сите напори да се дојде до него.
Разговорите во текот на целиот ден течеа интензивно, од старт средбата почна помеѓу четворицата лидери на една маса со Хан. Во меѓувреме, беше направена пауза за вечера, по што средбите продолжија.
Заев имал и средба со амбасадорот на САД, Џес Бејли на кој му ги соопштил одлучните ставови од кои немал намера да отстапи. Неговите позиции не ги разнишале ни предлозите на преговарачите кои на Заев му понудиле три ресори во преодната влада: финансии, транспорт и внатрешни работи.
Средбата во Брисел почна во 12 часот и на неа, освен Заев и Груевски, присуствуваа и лидерите на ДУИ и ДПА, Али Ахмети и Мендух Тачи.