Книгата „Речник на правни поими” е второ дополнето издание на авторот Александар Георгиев Калица и овозможува доближување на правните поими до граѓаните, истакна промоторот Горан Илиќ, професор и декан на Правниот факултет при УКЛО-Битола.
Според Илиќ, значењето на оваа книга и потребата за нејзино издавање се во насока на доближување на овие поими до граѓаните за полесно разбирање и нивна употреба во секојдневниот говор и работа.
На промотивниот настан што се одржа во НУ Универзитетска библиотека „Св.Климент Охридски“-Битола посебен акцент беше ставен и на терминолошкото изразување во медиумите при известување за тековни судски постапки, промени на закони и потребата на речник кај новинарите како алатка која ќе им биде од голема помош при правилна употреба и толкување на одредени правни поими.
Второто дополнето издание на речникот во 500 страници, содржи вкупно 3.500 правни поими, 590 популарни латински правни изреки и како новитет беше претставен третиот дел „Ознаки на судски уписници“, кој е составен од кратенки со кои се означуваат и евидентираат судските предмети, поделени по вид на суд и по вид на област.