Во рамки на одбелеувањето на 60-годишнината од потпишувањето на Римските договори, Делегацијата на Европската унија и Амбасадата на Италија, денеска во Битола приредија изложба „Уште поблиска Унија“.
Во своето обраќање ЕУ-амбасадорот Самуел Жбогар истакна дека потпишувањето на Римските договори во 1957 година бил првиот чекор кон обединета Европа. – Тоа се смета за година на раѓање на ЕУ таква каква што ја знаеме денес, рече амбасадорот на ЕУ во Република Македонија, Жбогар.
– Граѓаните на земјите-членки живеат во мир, просперитет и безбедност. Европската интеграција е најуспешниот мировен проект во нашата историја и затоа ЕУ ја доби Нобеловата награда за мир. Но, сега живееме во непредвидливи времиња, а годишнината од Римските договори не е само можност да ја потврдиме нашата посветеност кон вредностие и целите на кои се темели европскиот проект, туку и пригода да се преземат прагматични и амбициозни чекори напред, рече Жбогар.
Според него, во моментов во Европа се води дебата за тоа каква ќе биде ЕУ утре и дали ќе биде пообединета или пак земјите членки ќе бидат понезависни во нивното одлучување.
– Чекори се очекуваат и од државите на Западен Балкан кои имаат јасна перспектива да станат членки на ЕУ. Членството значи придобивки но и одговорности. Но ова е единствениот начин за опстојување на системот во корист на сите членки. Ова време е време на предизвици низ целиот свет, бара државништво, негување на демократските принципи, ставање на интересите на граѓаните на прво место и гледање и кон иднината, посочи амбасадорот на ЕУ во Македонија.
Според него, денес светот минува низ период на голема неизвесност, но ЕУ се повеќе ќе биде витална сила за зачувување и зајакнување на глобалниот поредок. ЕУ е најголемиот глобален пазар, водечки странски инвеститор во најголем дел од светот.
– ЕУ е активна во Македонија за да помогне во подготовките за идно членство. Како најголем донатор ЕУ има инвестирано во разни области, ЕУ е најголем трговски партнер и со самото тоа и најголем создавач на нови работни места, рече меѓудругото амбасадорот Жбогар.
Изложбата „Уште поблиска Унија“ ја отворија Жбогар и италијанскиот амбасадор Карло Ромео, а во соработка со УКЛО-Битола беше одржана студентска дебатa за „Иднината на Европската Унија 60 години од Римските Договори“.