Фондацијата „Д-р Димитар Котевски“-Битола и Спомен-куќата „Мајка Тереза“-Скопје го одбележаа Денот на сестринството и ја доделија традиционалната награда „Најуспешна и најхумана медицинска сестра за 2016 година“.
Со одлука на Управниот одбор на Фондацијата „Д-р Димитар Котевски“, годинешен добитник на наградата е медицинската сестра Мерлинда Драла, вработена во битолската болница „Плодност“.
– Секоја година доделуваме награда за најуспешна, најдобра и најхумана медицинска сестра. Во 2016 година ова признание и го доделивме на медицинската сестра Мерлинда Драла, акушерка која повеќе од 20 години е посветена на акушерството и гинекологијата и со својата стручност, работливост и хуманост кон пациентите заслужи да ја добие наградата најуспешна и најхумана медицинска сестра, истакна претседателот на фондацијата Димитар Котевски.
Според Драла, признанието претставува мотив и поттик за понатамошна посветеност на работата која со задоволство ја врши.
– Признанието е многу вредно, скапоцено. Се гордеам со добиената награда, но најмногу од се од почитта што ми е укажана, посочи Драла.