ВМРО-ДПМНЕ во реакција на обраќањето на лидерот на СДСМ Зоран Заев, наведува дека Заев и СДСМ зад себе немаат ниту еден позитивен проект или реформа која би била од полза за граѓаните и оти ваквата деструкција и неработењето Заев се обиде да го покрие со нови лаги и нереални ветувања.
Во реакцијата наведуваат дека мултимилионерот Зоран Заев и СДСМ мислат дека колку лагите и нереалните ветувања се поголеми, толку побргу ќе ги изманипулираат граѓаните и ќе ги натераат да заборават на нивното катастрофално, антидржавно однесување.
– Народот во Македонија тоа го знае. Народот нема да дозволи повторно да биде прелажан со лагите и ветувањата на СДСМ. На 24-ти април граѓаните ќе имаат можност да одберат помеѓу погубната политика на СДСМ и нивните големи лаги и помеѓу делата и конкретната програма која ја нуди ВМРО-ДПМНЕ која ја пишува заедно со граѓаните, стои во реакцијата во која се додава дека остануваат уште само 132 дена до соочувањето на СДСМ, со народот.
Според ВМРО-ДПМНЕ остануваат само уште 132 дена до катастрофалниот пораз на СДСМ и нивната безидејна и деструктивна политика.
– Мултимилионерот Зоран Заев и СДСМ денес уште еднаш ги потценија и понижија граѓаните и покажаа колку се плашат од престојните избори на 24-ти април, наведуваат во реакцијата и додаваат дека во минатото Бранко Црвенковски и Радмила Шекеринска ветуваа по еден вработен од секое семејство, а сега мултимилионерот Заев ветува дека ќе ја врати средната класа.
– Мултимилионерот Зоран Заев за Струмица вети: 300 фабрики и 3000 вработувања, парк за ИТ компании, нови училници во Баница, три детски градинки, терени за голф, уредено Турско маало, асфалтирање на локални улици и уште десетици други лажни ветувања. Резултатот од сето ова е само една голема нула. Мултимилионерот Заев сега ветува 550 километри автопат и 1000 километри локални патишта, стои во реакцијата.
Додаваат дека Заев кој ги препраќаше локалните бизнисмени во Струмица во менувачницата на Вицето да даваат по едно евро за метар квадратен, сега има образ да ветува дека ќе им обезбеди поддршка на малите и средни претпријатија од цела Македонија, дека партијата на Заев која ги тепаше земјоделците и не им даде ни денар субвенција кога беше на власт сега ветува дека ќе планирал вистински земјоделски развој, како и за тоа дека додека пред меѓународни судови се води спор за попречување на конкуренцијата во мобилната телефонија од страна на Влада на СДСМ, Заев ветува дека истата партија ќе обезбедела нова конкуренција на мобилните оператори.
– Партијата на мултимилионерот Заев ветува економски напредок, а истата ја спроведе мрачната транзиција која остави зад себе рекордна невработеност од 39 отсто, затворени 684 фабрики, криминална приватизација и над 200.000 отпуштени работници. СДСМ во своето владеење остави пустош кој до ден денес остава последици, наведуваат од ВМРО-ДПМНЕ и додаваат дека колку и да се труд Заев своите нови лаги да ги спакува во безлични политички флоскули, граѓаните го имаат веќе прочитано.