Со оставката на директорот на затворот во Шуто Оризари, Ѓоко Котевски, не смее да се прикрива одговорноста на инспираторите и нарачателите на нападот врз Ристовски и Јанакиески, сметаат од ВМРО-ДПМНЕ.
Според партијата, премиерот Заев и министерката за правда, Рената Дескоска, мора да сносат одговорност за тепањето на нивните членови и поранешни министри.
„Одговорност мора да има од Заев и Дескоска, а не истите да се вадат на одговорност само во пониските ешалони на власта. Тепањето на Јанакиески и Ристовски е акт на деспотизам кој не смее да остане неказнет. Чинот што било дозволено тепање на притвореници е срам за демократијата“, се наведува во партиското соопштение.
Од опозициската партија оценуваат дека срамен и недозволив е фактот што властите не го спречиле тепањето, туку синхронизирано се обиделе да ја манипулираат јавноста, дека истиот или не се случил или дека е незначителен.
„СДСМ не смее да бега од одговорност. Чинот на тепање затвореници е акт на незрело и недемократско уредување, кое, за жал, стана државата со Зоран Заев на чело на владата“, истакнуваат од ВМРО-ДПМНЕ и го повикуваат Народниот правобранител и сите меѓународни претставници во земјата да го испитаат случајот и да спречат, како што велат, понатамошно кршење на човековите права.