Стружани и Кичевчани се огорчени од изјавите на Зоран Заев дека коалициите на СДСМ и ВМРО-ДПМНЕ во Струга и Кичево биле погрешен потег, изјави денеска на прес конференција секретарот на ОК на ВМРО-ДПМНЕ од Струга Ѓоко Илоски.
Овие коалиции, додаде тој, беа направени како резултат на желбата за заеднички настап и на членовите на СДСМ и на членовите на ВМРО-ДПМНЕ, но и на сите граѓани на Струга и Кичево за одбрана на интересите на овие две општини и обезбедување нивен напредок.
– За Заев погрешно е ако народот во Струга се здружи, за да си ги брани сопствените интереси, но не е погрешно ако другите го прават тоа. Како е возможно Заев од една страна да повикува за градење на заеднички консензус на централно ниво, а притоа во општини каде што консензусот помеѓу СДСМ И ВМРО-ДПМНЕ веќе постои, тој да го урива и да го нарекува погрешен. Тоа е крајно лицемерно, рече Илоски.
Според него, во Струга граѓаните покажале што е патриотизам, како се брани интересот на својот роден град, а како што рече, ако Зоран Заев се срами од патриотизмот, тогаш тој се срами од своите членови и граѓаните во Струга.