ВМРО-ДПМНЕ испрати соопштение, реакција на изјавата на Оливер Спасовски.
„Помина речиси еден месец откако полицијата под контрола на Оливер Спасовски пукаше во две малолетни деца во Струмица, а одговорност за тој настан никој не понесе.
Поминаа два месеци откако беа осквернавени гробиштата во скопско Љуботен, но сеуште нема никакви резултати од истрагата на овој грозоморен чин, а виновниците се сеуште на слобода.
Поминаа две недели од грозоморното убиство на плажа во Струга сред бел ден, а сторителот сеуште претставува потенцијална опасност.
Во Скопје горат автомобили речиси секоја вечер, а насилници секојдневно се пресметуваат по локалите и дискотеките. Портали блиски до СДС почнаа да објавуваат вести дека насилници блиски до партијата почнале да рекетираат нивни бизнисмени.
Тоа е реалноста во која што живеат граѓаните. Оливер Спасовски може да се обидува да манипулира дека е намален криминалот, но еден ден ќе мора да се соочи со реалноста и нема да може да избега од одговорноста за хаосот и кризата во која е втурната државата. Одговорност мора да има и ќе има. Со заминување на неспособната власт на СДС ќе се врати правната држава и сите ќе одговараат за незаконските постапки“ се вели во соопштението на ВМРО-ДПМНЕ.