СДСМ се плашат од правдата и од вистината, а ние им повторуваме дека со тоа нема пазарење, се истакнува во денешната писмена реакција од ВМРО-ДПМНЕ на соопштението на СДСМ.
– Граѓаните на Македонија и во Скопје пред една недела и денес во Битола, во огромен број, масовно и одлучно, покажаа дека не веруваат на деструктивци и на луѓе што работат против сопствената држава, туку веруваат и ги поддржуваат оние кои знаат да работат, да градат и да помагаат, стои во соопштението.
Граѓаните, според ВМРО-ДПМНЕ, покажаа дека монтираното сценарио на СДСМ не добива никаква поддршка и дека ќе им се врати како казна на оние кои го смислија и на оние кои го спроведуваат.
– ВМРО-ДПМНЕ денес промовираше неколку нови инвестиции, неколку нови инфраструктурни проекти и неколку нови мерки за вработување на невработените. Така и ќе продолжиме во иднина затоа што знаеме што им е потребно на граѓаните. СДСМ нека продолжат во нивниот деструктивен филм кој девет години ги држи на дното, се вели во соопштението од ВМРО-ДПМНЕ.
