Заев и Пендаровски наместо правда промовираат монтирани процеси, политички реваншизам и нарачани пресуди, велат во соопштение од ВМРО-ДПМНЕ.
Според опозициската партија, 211 години затвор за обвинетите за настаните од 27 април се врв на политичкиот реваншизам.
„Професионалци и искрени патриоти се судат за дело што не го сториле. Се кршат нивните човекови права и се злоупотребува институцијата притвор, само да се понижат и заплашат. Власта дејствува надвор од правото. Ниту делото за кое ги обвини русковска-обвинителството, а ги осуди кацарска-судството го сториле, ниту, пак, притворите што им ги определија се правно издржани“, стои во партиското соопштение во кое се додава и дека случајот 27 април е инквизиција на 21 век, незабележан во модерна Европа.
Од ВМРО-ДПМНЕ повикуваат дека СДСМ и нивните пулени кои го имаат окупирано системот мора да си заминат, а како што велат, единствен начин за тоа е победа на претседателските избори на Гордана Силјановска-Давкова.
