ВМРО-ДПМНЕ го повикува СДСМ да го поддржи предлог-законот за зголемување на платите во јавниот сектор за пет отсто кој е во собраниска процедура и кој наскоро треба да се најде на гласање пред пратениците.
– Ако СДСМ во предизборниот период беа искрени кога ветуваа 16.000 денари минимална плата и 30.000 денари просечна плата, тогаш без одложување треба да го поддржат овој предлог со што ќе им се зголемат платите на вработените во јавниот сектор за пет отсто. Доколку не го поддржат, уште еднаш ќе го покажат своето лицемерие и без грижа кон граѓаните, изјави Лилјана Кузмановска.
Според неа, ВМРО-ДПМНЕ го предложи законот врз основа на реалните потреби на лицата вработени во јавниот сектор.
– Предлог-законот предвидува покачување на платите во јавниот сектор за пет отсто во 2018 година и за дополнителни пет проценти во 2020 година, за образованието, војската, полицијата, здравството,.. Ние имаме кредибилитет да го нудиме и реализираме ова покачување бидејќи кога бевме на власт ги зголемивме платите во јавниот сектор за околу 30 отсто. Штом можело тогаш, може и сега. Овој предлог го имаме и во програмата за избори и ако бевме власт како што народот одлучи, ќе ги зголемевме платите во јавниот сектор, потенцира Кузмановска.
ВМРО-ДПМНЕ, додаде, не гледа причина зошто СДСМ не го гласаше законот за покачување на платите во собраниската Комисија за труд и социјална политика.
– СДС не го гласаше законот во Собраниската Комисија за труд и социјална политика, но овој закон помина во следна фаза бидејќи доби поддршка и од пратеници кои не се дел од нашата коалиција, кои заедно со ВМРО-ДПМНЕ го поддржаа законот. Тоа најдобро говори дека овој закон за покачување на платите во јавен сектор е позитивен, реален и корисен, рече Кузмановска.