Да знаеше Оливер Спасовски дека СДСМ има барем минимална шанса да добие поддршка од граѓаните на претседателските избори, тогаш ќе опстоеше во намерата да се кандидира, реагира ВМРО-ДПМНЕ. Опозицијата смета дека Заев и Спасовски го жртвувале Пендаровски, бидеќи знаеле дека ќе загубат.
„Спасовски знае дека нивната неспособност и криминогеност се препознаени и затоа заедно со Заев решија да го жртвуваат Пендаровски кој треба да ги изгуби изборите. Затоа Спасовски и Заев одат со старите катастрофални лаги и дополнително го закопуваат Пендаровски“, вели ВМРО-ДПМНЕ во реакцијата.
Според опозицијата во земјата никој не се чувствува безбеден.
„Со Заев, Спасовски, Пендаровски и нивниот крими картел, никој не се чувствува безбеден на улиците.
Мајката на исчезнатиот Пино, родителите на брутално ликвидираниот Мартин и семејството на избодениот Филип се најдобриот доказ дека во Македонија мафијата е на власт. Во Прилеп полицаец уби и запали човек. Во Шуто Оризари полициски службеници се пресметуваа меѓу себе, а соработници на Спасовски рекетираа луѓе оддавајќи ПИ мерки. Тоа е хаосот што го креираа Заев, Спасовски и советници како Пендаровски“, вели ВМРО-ДПМНЕ.
Партијата додава и дека за теоретско и практично тестирање за полагање на возачките испити, милионски суми биле дадени на фирми без никакво искуство, кои биле регистрирани непосредно пред изборот. ВМРО-ДПМНЕ вели дека тоа е доказ за приоритетите на крими картелот.