Денешниот напад врз новинарите е обид за заплашување, замолкнување и цензура кон сите оние кои што се осмелуваат да ги истражуваат и отворено да говорат за криминалите на власта, велат од ВМРО-ДПМНЕ во врска со конфронтацијата на вицепремиерот Анѓушев со новинарот на Алсат М.
„Однесувањето на власта кон претставниците на седмата сила е показател на односот на власта кон севкупната јавност. Денешното однесување на еден заменик претседател на Влада кој што демонстрирал физичка сила пред новинари, користејќи закани и замавнувања само како резултат на негово незадоволство од новинарската работа е само доказ дека криминалниот картел на власт нема ниту трошка демократски капацитет“ се вели во соопштението на ВМРО-ДПМНЕ.
Од опозициската партија го осудија овој и сите досегашни испади со демнстрација на сила и заплашување против медиумите и инсистираат на жесток одговор и осуда од институциите.
„Денешниот случај во кој што е вмешан министер за жал е само продолжение на насилството кое се спроведува врз јавноста. Истовремено ВМРО-ДПМНЕ ги охрабрува медиумите, нивните сопственици но уште повеќе директни претставници, новинарите, фоторепортерите и снимателите, да не подлегнуваат под притисокот и да останат првите и вистински борци за демократијата и да продолжат да објавуваат за вистината за матните зделки на криминалниот картел на власт“ велат од ВМРО-ДПМНЕ.