ВМРО-ДПМНЕ во писмена реакција на изјавата на кандидатот за градоначалник на општина Карпош Андреј Петров посочува дека изминатите години во општината биле реализирани повеќе проекти од Владата и Град Скопје, но оти за тоа немало поддршка од локалната самоуправа раководена од СДСМ.
– Многу е несериозно што се фалите со изградена ролерска патека од 100 метри на кејот на Вардар и ветувате рекреативни паркови за коњички спортови, а одбегнувате да се соочите со вистинските проблеми кои ги засегаат граѓаните на општина Карпош. Секојдневно се фалите со некаква прогама која очигледно не постои и со проекти за кои немате никаква гаранција дека ќе ги реализирате, ниту пак знаете колку ќе чинат и кој е рокот во кој би требало да се завршат, се вели во соопштението на ВМРО-ДПМНЕ.
Од оваа година, како што е наведено, Агенцијата за млади и спорт со Спортско рекреативниот центар „Борис Трајковски“ и Бирото за развој на образованието, воведоа пливање во базенот во Карпош за сите ученици од Скопје.
ВМРО-ДПМНЕ потсетува на реализираните проекти меѓу кои се проширувањето и реконструкцијата на булеварите „Илинден“, „Митрополит Теодосиј Гологанов“, „Партизански одреди“ изградба на булеварот МАНАПО, реконструкција на базенот Младост и целосна реконструкција на опожарената зграда на основното училиште „Јан Амос Коменски“.
– Со поддршка на Владата е започнат проектот Аква Парк, а веќе е завршен и е пуштен во употреба трговскиот центар Скопје Сити Мол, кој и даде посебен и модерен лик на општината како и изградба спортско рекративниот центар „Борис Трајковски“, стои во партиското соопштение.