Носителот на советничка листа на ВМРО-ДПМНЕ и коалицијата „За подобра Македонија“ за општина Центар, Томислав Лазаров на денешната прес-конференција рече дека кандидатите на СДСМ наместо да понудат дела нудат бесмислени, неостварливи и нереални проекти и ветувања.
– Типичен пример за крајно нереален проект даде Андреј Жерновски вчера. Тој наместо да нуди проекти за улици, училишта, детски и спортски игралишта ветува дека општина Центар ќе го покрива со 30 отсто чинењето на секој нов купен велосипед, без притоа да каже колку тоа ќе чини и како тоа ќе се одрази врз буџетот на општината и како ќе ги обезбеди средствата за тоа, рече Лазаров.
Според него, Жерновски не објаснува какви финансиски импликации ќе има неговиот предлог.
– Со оглед на тоа што за една година граѓаните на Центар можат да купат 20.000 велосипеди чија просечна вредност е 300 евра, тоа ќе значи дека само за една година од буџетот на општината ќе се одлеат околу 2 милиони евра, рече Лазаров и додаде дека тоа се средства со коишто општината може да изгради нови улици, катна гаража или пак да прошири булевар, а со тоа директно да помогне во подобрување на сообраќајната инфраструктура.
Тој и порача на коалицијата предводена од СДСМ дека изборите се добиваат со програми, конкретни и целосно финансиски издржани проекти, а не со препишани и набрзина склопени нереални ветувања.