Жарко Кузмановски, Ненад Серафимовски, Сашо Самојловски, Бобан Ивановиќ, Горан Илиевски, Исамедин Османи, Љубиша Аранѓеловиќ и Горан Стојменовиќ, засекогаш ќе останат запишани меѓу хероите кои се бореле и ја создале Република Македонија, велат од ВМРО-ДПМНЕ, а сите ние ќе им бидеме вечни должници за нивната неверојатна храброст и пожртвуваност.
– ВМРО-ДПМНЕ длабоко се поклонува пред ликот и делото на 8-те херои, припадници на безбедносните структури на Република Македонија, кои пред 2 години во Куманово во антитерористичка акција ги положија своите животи во одбрана на Република Македонија. Вечна им слава. Македонија никогаш нема да ги заборави своите херои, рече на денепната прес-конференција Драган Данев од ВМРО-ДПМНЕ.
Од партијата сметаат дека за разлика од нив Зоран Заев и Оливер Спасовски засекогаш ќе останат на другата страна, како што велат, меѓу оние кои му свртеле грб на својот народ.
– Зоран Заев и Оливер Спасовски треба цел живот да се срамат за своето нечовечко и предавничко однесување и дејствување. Тие треба цел живот да се срамат затоа што денот по антитерористичката акција отидоа и се сликаа селфи смеејќи се на местото на кое пред само неколку часа подмолно беа убиени 8-те храбри синови на нашата држава. Поддржувачите на Заев ги напаѓаа и навредуваа колегите на загинатите херои и на полициските службеници им порачуваа „Куманово пак да ви се случи”, рече Данев.
Тој побара одговор зошто Заев и Спасовски се смееле и фотографирале на местото каде што биле убиени македонските херои и зошто, како што рече, медиумите под контрола на СДСМ и Сорос објавувале лажни вести за загинати мајки и деца.
Според него, Зоран Заев прифатил реализиција на тиранска платформа и со тоа, како што рече, прифатил да најде начин да ги пушти на слобода терористите кои ги убија припадниците на полицијата кои ја бранеа Македонија.
– Зоран Заев за да дојде на власт и да ја реализира Тиранската Платформа се обиде насилно да избере претседател на Собрание. Затоа видовме албански знамиња во кабинетот кој треба да му припаѓа на претседателот на Собранието и се најавува дека македонското Собрание ќе биде трет парламент во регионот каде што седниците ќе се водат на албански јазик. Одговорност за политичкото насилство на Заев и СДС мора да има, рече Данев.