Доколку борбата на граѓаните на Вевчани во комунизмот беше поврзана со правото на демократија, а на почетоците на независноста за своја општина, убеден сум дека денес новата голема битка на Вевчани е подобрувањето на животот на граѓаните. Вака вечерва на партиска конвенција на ВМРО-ДПМНЕ во Вевчани им се обрати на вевчанци кандидатот за градоначалник од оваа партија Цветомир Угриноски.
Угриноски пред своите сограѓани вети поголем развој на општината, инвестиции и подобар живот.
– За време на мојот мандат како ваш градоначалник, јавно ветувам дека ќе се заложам за создавање услови за развој на зимскиот и на летниот туризам преку создавање услови за вложување во сместувачките капацитети, како и за отворање на индустриска зона со цел заинтересираните компании да инвестираат во нашите краишта. Ќе го реализирам и проектот „Општината ги стипендира најдобрите“ со цел да ги поттикнеме најдобрите ученици и студенти од Вевчани, ќе ја изградиме спортската сала во основното училиште „Страшо Пинџур“, како и повеќенаменско спортско игралиште, рече Угриноски.
Доколку ја добие довербата на своите сограѓани, тој вети и доградба на канализациската мрежа во Вевчани, подобрување на хигиената во општината и доградба на кејот по должината на Вевчанска Река.
– Во насока на подобрување на условите за живот ќе се заложам и за поставување бесплатни интернет-точки на повеќе локации во Вевчани. Конечно, но не помалку важно јавно ветувам дека ќе продолжиме со натамошна урбанизација на просторот, со асфалтирање на улици, како и со подобрување на патната инфраструктура, додаде Угриноски.
Според претседателот на Општинскиот комитет на ВМРО-ДПМНЕ од Вевчани Нацко Ставрески, Вевчани, иако е мала општина, сепак е значаен дел од Република Македонија, поради што, како што рече, мора да се реализираат новите идеи и со нови сили да се продолжи кон остварување подобар живот на граѓаните.
– Со оглед на нашето долгогодишно опстојување како лидери на политичката сцена во општина Вевчани, не смееме ни најмалку да затрепериме, но да продолжиме онаму каде што застанавме и со заеднички сили сплотени и единствени да оствариме нова победа и успех за доброто на Вевчани, подвлече Ставрески.
Кандидатот за градоначалник на Вевчани од ВМРО-ДПМНЕ Цветомир Угриноски е приватенн стопанственик кој доколку победи на локалните избори закажани за 24 март годинава, ќе го наследи неговиот сопартиец, актуелниот градоначалник Перо Илиески.