ВМРО ДПМНЕ и коалициските партии синоќа во Новаци го промовираа Лазар Котевски кандидат за градоначалник на таа општина, од кого очекуваат трет мандат и победа во првиот круг на локалните избори.
На промотивниот настан, пред граѓаните на Новаци, симпатизерите и членовите на ВМРО ДПМНЕ, градоначалникот Котевски истакна дека амбициите на општината се да биде препознатлива во државата и странство за што се најавени нови збратимувања со општини од Словенија, Хрватска, Србија, Турција и од Унгарија.
– Нашата визија е да бидеме во чекор со европскиот модел на водење на локалните заедници, да ги следиме новите модерни технолошки достигнувања, континуирана соработка со граѓаните и јакнење на капацитетот на младата и стручна администрација за да биде поефикасна во извршувањето на задачите. Новите развојни проекти ќе резултираат со позитивни ефекти и нови вработувања и перспектива за младите како наш приоритет, посочи Котевски.
ВМРО-ДПМНЕ ги избра најдобрите идеи на граѓаните и како градоначалник нема да ветувам туку ќе исполнувам затоа што народот сака одговорни политичари, потенцира Лазар Котевски и најави победа во првиот круг од мартовските локални избори.
-Со континуираната поддршка на Владата на Република Македонија и меѓународна финансиска помош во наредниот период ќе извршиме асфалтирање на патот до селата Мегленци, Арматуш и до Зович, како и патот Рибарци-Гнеотино. Ќе овозможиме користење на ХС „Стрежево“ за наводнување на Новачко поле, изградба на брана на реката Елешка, како и инсталирање на парно греење во општина Новаци за што во тек е проектот „Телетерм“, истакна Котевски.
Во третиот мандат актуелниот градоначалник на општина Новаци најавува дека ќе продолжи со реализација на комуналните и инфраструктурни проекти, изградба на мини акумулации во селата Брод, Арматуш, Грумази, Долно Орехово, Мегленци, Маково, Рапеш, Тепавци и Старавина, како и реконструкција на амбулантите во таа локална самоуправа.
-Со посебно внимание пристапуваме во реализација на проектот реконструкција на „Куќата на Калеш Анѓа“, мостот и воденицата во село Зович како и црквата „Св.Димитрија“ во село Градешница. Ќе соработувам со секој чесен, стручен, способен и добронамерен жител на општината затоа што моите животни принципи на чесност, транспарентност и грижа за жителите на општина Новаци се принципите на досегашен и иден градоначалник на општина Новаци, истакна кандидатот Лазар Котевски на синоќешната промоција што ја организираше владејачката ВМРО ДПМНЕ.