Марија Којзеклиска од ВМРО-ДПМНЕ денеска на прес-конференција изјави дека СДСМ го потценува Штип и штипјани кандидирајќи човек кој бил претставник на црвената буржоазија и оставштина од криминалната транзиција.
– Благој Бочварски има желба неговиот градежно фамилијарен клан да завладее со бизнисите во Штип и општината да ја претвори во приватна тезга. Едноставно општината сакаат да ја претворат во свој приватен бизнис како што се приграби и фирмата „Пелагонија Штип“ со која управува семејството Бочварски. Синот Благој се кандидира за градоначалник на Штип, таткото Венцо градежен инспектор во истата општина, а семејството Бочварски управува со компанијата „Пелагонија Штип“. Одлична шема за добивање на сомнителни бизниси. Тоа е и целта на кандидирањето за градоначалник, рече Којзеклиска.
Таа рече дека ако на ова се додаде фактот дека неговиот зет за сестра, Емануел Шекеринов е познат во штипската јавност како братучед на Радмила Шекеринска, дополнително се добива слика дека метастазите на градежната мафија го надминуваат локалното, и се шират дури до централно државно ниво.
– Бочварски не запираат! Тие сакаат да ја приватизираат општината. Желбата не е да се помогне на граѓаните на Штип туку да се водат приватни бизнис интереси на семејството Бочварски. Штипјани тоа нема да го дозволат. Штип заслужува подобро. На 15-ти октомври Штипјани ќе се одлучат за напредок, за работа и за нови проекти, заврши Којзеклиска.
