ВМРО-ДПМНЕ излезе со соопштение по започнување на проектот „црвен телефон“ на Телма телевизија со кој порача дека не прифаќа никакви притисоци , ни од власта, ни од опозицијата.
ВМРО-ДПМНЕ ја прашува пред целата јавност телевизија Телма да каже со име и презиме кој се јавувал и правел притисоци кај нив.
„Тоа е најважно во овој момент. Ако не се соопшти директно, тоа ќе значи дека Телма прави површен маркетинг на сметка на наводна борба против притисоци“, велат од ВМРО-ДПМНЕ.
ВМРО-ДПМНЕ инсистира Телма да објавува прилози какви што сака и да не прифаќа никакви притисоци.
„Но, во една ваква политичка ситуација, телевизија Телма со вакви чудни маркетиншки потези само добива сивило кое ни црвен телефон не може да го промени. Треба работите да се ословуваат со име и презиме. ВМРО-ДПМНЕ бара јавно да се каже кој прави притисок врз Телма и инсистира да не се ставаат сите политичари во ист кош. Телевизија Телма после овој потег има силна обврска пред јавноста да каже кој и вршел притисок. Ако Телма не го направи тоа, тогаш ќе остане јасно дека црвени телефони и површен маркетинг за слобода им се позначајни од транспарентноста и точното информирање“, се вели во соопштението од ВМРО-ДПМНЕ.
ВМРО-ДПМНЕ ќе ја прашува Телма да објави кој и правел притисоци, се додека не објави.
„Тоа е наша должност за да се спротивставиме заеднички на сите обиди за манипулација на јавноста. На јавноста, откако Телма направи ваков чекор, не и се доволни црвен телефон и маркетинг директор кој го смислил ова. На јавноста и треба име и презиме кој и кога правел притисок врз оваа телевизија“, се вели во соопштението на ВМРО-ДПМНЕ.