За вчерашните случки, за вандализмот и демолирањето во општина Центар од страна на неколку стотици „верници“, со реакција се јави и Европската епархија на МПЦ-ОА на митрополитот Пимен, преку Фејсбук фан страната.
„Отидов до центар да видам како напредува градбата со уште двајца колеги. Од некаде се зададе една гооолема група на луѓе подржувачи на градбата. Од верски побуди верував, координирани од своето парохиско свештенство мислев… Ама кога минуваа покрај нас, добив впечаток дека минуваат покрај „турски гробишта“. Не знам дали не нè видоа или не знаеја како изгледа православен владика. Белким од побожност се заслепени, не знам. Ама и јас шо мајка барав таму сега не знам. Дај бе некој од тоа архибригадата нека ме покани на кафе и да ми објасни што се случува на ова протести и контра протести, јас плаќам кафето“, напиша владиката Пимен на Фејсбук.
Нешто подоцна, откако демонстрантите започнаа да ја кршат општина Центар, владиката повторно објави своја реакција.
„Вака ли го сведочиме мирот Христов верен народе? Рушиме општина во обид да спречиме „рушење“ на црквата. Дајте да ги наполниме црквите наместо опшинските дворови. Само така се чува и брани црквата и верата мој верен народе! Бог од нас бара милост, а не жртва! Сепак, фала Ти Господи за сè“, напиша владиката Пимен на Фејсбук.