Владата одлучи да преземе системски мерки за воспоставување систем за обезбедување на пазарни информации за извоз и пласман на земјоделски производи, за потребите на преработувачите и другите засегнати.
„Како дел од мерките кои ќе се спроведуваат континуирано на овој план, покрај системскиот пристап, Владата одлучи да преземе и да реализира и конкретни пакет мерки и активности чија цел е да се овозможи што поголем пристап на овие пазарни информации до земјоделците, преработувачите и трговците”, рече владиниот портпарол Александар Ѓорѓиев.
Суштината на проектот се определува со тоа што, како, кога и за каде да се произведува и пласира, се со цел обезбедување на профит и задоволување на потребите на граѓаните.
Потребата за ваков систем ја детектирале заедно со Министерството за земјоделство, шумарство и водостопанство, при што било констатирано немање соодветна транспарентност на проток на информациите и нивната достапност на секој засегнат учесник
„Проблеми со капацитетот на човечки и технички ресурси на снабдувачите со пазарни информации, ниско ниво на организирање на учесниците во синџирот за производство на определен производ,недостаток и практична примена на мерките за заедничко уредување на пазарите”, вели Ѓорѓиев.
Со цел да ја унапреди состојбата на ова поле, и да се даде поддршка на земјоделците, преработувачите и трговците за квалитетно производство и пласман на производите Владата, одлучи финансиски да ја помогне оваа сфера, да обезбеди и да овозможи пристап до пазарните информации, и да овозможи едукација и поддршка на овие целни групи.
„Столб на системот е силен Пазарен информативен систем, и финансиска поддршка за остварување на тесна соработка помеѓу земјоделците, преработувачите и трговците”, рече Ѓорѓиев.