Владата и Собранието се уште ги игнорираат барањата на народниот правобранител, Иџет Мемети, за информации по однос на прекршувањата на правата и слободите на граѓаните во аферата со масовното прислушување која ја обелодени опозицијата и го попречуваат во неговото истражување за незаконско следење на комуникациите.
Управата за безбедност и контраразузнавање уште од април годинава го игнорираа државниот омбудсман, министерот за внатрешни работи, Митко Чавков, му одоговорил дека не може да му ги исполни барањата, а Јавното обвинителство одговорило дека станува збор за тајни податоци.
-Последно што направивме е што се обративме до Владата со посебен извештај за попречување во нашата работа. До сега молчат и од Собрание и од Владата – изјави денеска народниот правобранител.
Тој на 26-ти јули побара Владата да му помогне во барањето на информациите. Поради молкот Мемети во септември побара од Собранието да расправа на оваа тема, но два месеци подоцна парламентот се уште не го разгледал извештајот.
Мемети има отворено две постапки поврзани со незкаонското прислушување, една по сопствена иницијатива за прекршување на уставните и законските права на граѓаните, а втората ја доби во живо во емисијата Топ Тема на „Телма“ од уредникот Снежана Лупевска Созен.
Маја Васева