Парите кои државата им ги вети на граѓаните со ниски примања со четвртиот пакет мерки, а не ги добија, треба да бидат исплатени до крајот на мај. Собранието по два месеци блокади го изгласа амандманот на Законот за финансиска поддршка на ранливите категории граѓани.
Сега, на ред е Владата да ги ажурира податоците на веб-страницата „Купувамдомашно.гов.мк“ и да ги испрати до банките, по што ќе се изврши исплатата. Тоа значи дека граѓаните со блокирани сметки, чии банки одбија да им отворат потсметки за да им ја исплатат помошта, ќе бидат распределени во други банки.
„Законската измена ги покрива граѓаните кои имаа блокирани сметки и неажурирани податоци до 25.12.2020. Владата прави сѐ, парите да стигнат до оние на кои им се најпотребни. “, велат од Владата за„ А1он“.
Засега нема информација кога ќе биде завршена прераспределбата, за да по скоро пет месеци, 22.000 граѓани со ниски примања, конечно ги добијат средствата кои државата им ги вети со четвртиот пакет мерки. Од увидот што „А1он“ го имаше кај неколку граѓани кои се соочија со овој проблем да не можат да ги подигнат 6.000 денари преку „Купувамдомашно.гов.мк“, тие се уште не се прераспределени.
Со изгласувањето на амандманите, парите ќе ги добијат и 2.132 граѓани, чии приговори беа прифатени. До Владата беа поднесени и 78 илјади приговори.
Додека и натаму трае исплатата на четвртиот пакет-мерки, Владата донесе и петти пакет економски мерки наменет за граѓаните и компаниите. Петтиот пакет содржи вкупно 29 мерки во вредност од 9,7 милијарди денари или приближно 160 милиони евра.