Здружението на новинари денеска од пред Апелациониот суд порача дека политичките калкулаци при носењето одлуки на судската власт се недозволиви за да се амнестираат грешките на власта.
Претседателот на ЗНМ, Насер Селмани рече дека сите новинари се Томислав Кежаровски и дека одлуката за намaлување на казната од 4,5 години на две е милостина на судот.
Новинарите побараа ослободителна пресуда за Кежаровски, а не одлука за белеeње образ на некој кој згрешил пред две години.
Селмани посочи дека за невин човек и еден ден во затвор е многу, а не две години.
„Апелација сака да не убеди дека државата никогаш не греши и со тоа сака нас да не обесхрабри како новинари да ја вршиме основната функција во едно општество критички да ја опсервираме работата на јавните институции. Ако власта имаше намера да не застрашува не ја постигна целта. Ние не се исплашивме и како никогаш порано сме сплотени и солидарни со нашиот колега Кежаровски. За нас слободата на Кежаровски е безусловна. Таа е и наша слобода. Ние сме сите Кежаровски и јас сум Кежаровски“, изјави претседателот на ЗНМ Насер Селмани.