Градоначалникот на општина Центар, Андреј Жерновски, денеска оствари средба со Н.Е. Амбасадорот на САД во РМ, Џес Бејли, во просториите на Американската амбасада во Скопје.
На средбата, како што изјави Жерновски, е разговарано за актуелните случувања на политичката сцена во Република Македонија, во пресрет на локално избори.
„Се заблагодарив за поддршката која Соединетите Американски Држави ја дадоа кон граѓаните на општина Центар, почитувајќи ја нивната јасно изразена волја. Кога ние, медиумите и администрацијата бевме нападнати од насилните демонстранти, тие дојдоа лично да се уверат што се случува и да ни дадат поддршка, рече Жерновски.
Градаоначалникот на општина Центар, одговарајќи на новинарски прашања на прес конференцијата, посочи дека нарачателите на вандализмот во општина Центар се истите оние кои синоќа испровоцираа група граѓани на протестот брутално да нападнат снимател и новинар.
„Најостро го осудувам вчерашниот напад врз новинарите. Не може никој да ја загрозува слободата на медиумите. Влезени сме во партиска кампања и очигледно, ова ќе биде стилот на водење кампања на партијата на власт. Ова се јасни знаци дека ќе се обидат да ги загрозат и спречат демократските процеси. Волјата на народот треба да се почитува и оној кој има обезбедено мнозинство во парламентот, треба да го добие мандатот“, рече Жерновски.