Процесите полека ги дефинираме, имаше две неразумни причини од Иванов за недоделување на мандатот и со тоа се изместија сите процеси кои што треба да течат во нормален тек. Со целосно право како човек и партија позади кои стојат 67 потписи имам право да очекувам да биде доделен мандат за да направиме обид да формираме Влада, рече лидерот на СДСМ, Зоран Заев одговарајќи на новинарски прашања.
Според него, мудроста, присебноста и толеранцијата ги ставиле во позиција да имаат разбирање дури и кога причините за недавање мандат се неразумни.
– Презентиравме програма на новата Влада за да докажеме дека нема веќе појдовни основни политички партии, програми, платформи, декларации или изјави, туку има програма за Влада на Македонија која во својата преамбула има заштита и унапредување на унитарноста на државата, Уставниот поредок на Македонија и ЕУ и НАТО, рече Заев.
Лидерот на СДСМ потсети дека денеска до Собранието доставија иницијатива за продолжување на конститутивната седница потпишана од 67 пратеници и кажа дека се надева дека Собранието наскоро ќе продолжи со работа и ќе се избере нов претседател на Парламентот.
Александар Тодески