Со музичко забавен хепенинг, денеска на градскиот плоштад „Гоце Делчев“ во Струмица беше одбележан Меѓународниот ден на лицата со даунов синдром. Организаторите, Здружението „Вера“ и граѓанската иницијатива „Мрдни со прст“ во рамки на одбележувањето ги доделија фотографиите на лицата кои беа дел од минатогодишната кампања „Разбуди се“.
– Денеска ги славиме различностите. Прифатете не такви какви што сме бидејќи и ние заслужуваме еднакви права во ова општество. Да се заблагодарам на сите вклучени во проектот „Разбуди се“ кој беше чекор во подигањето на свеста кај граѓаните за лицата со даунов синдром, но и за оние со посебни потреби, рече Анче Туфекчиева, претседател на Здружението „Вера“ од Струмица.
Во одбележувањето на Меѓународниот ден се вклучи и општина Струмица.
– Посебно сум горд што општина Струмица целосно стои во реализацијата на проектот „Разбуди се“. Ние и понатаму ќе продолжиме со поддршка на здруженијата на граѓани кои се занимаваат со оваа проблематика, зошто овие лица тоа и го заслужуваат. Различностите треба да не’ обединуваат, а не да не разделуваат, рече в.д градоначалникот на Струмица, Коста Костадинов.
Дополнително, колоритноста на плоштадот ја збогатија учениците од основните училишта кои излегоа да го прослават доаѓањето на пролетта.