Општинскиот комитет ВМРО-ДПМНЕ Прилеп го обвини градоначалникот за незаконско поставување на директорката на градинките во Прилеп.
„Г-дине градоначалник, Илија Јованоски, Ве повикуваме пред целата јавност да кажете по кој закон е именувана директорката на градинките во Прилеп Благица Филипоска, која вчера по Ваша наредба си поднесе оставка во попладневните часови и на нејзино место експресно ставивте за директор друг човек?“, прашуваат од партијата.
Од таму велат дека Филипоска со наредба на Јованоски е вработена со договор за еден месец на место помошник раководител на една од градинките на 24 ноември лани, за да само по 3 дена, т.е. на 27 ноември е именувана за в.д. директор на градинките во Прилеп.
„Минатата недела веќе ги повикавме и просветниот и трудовиот инспекторат да ја исконтролираат работата во училиштата и градинките во Прилеп. Сега повторно ги повикуваме истите тие веднаш да преземат соодветни мерки“, велат од партијата.
Од таму ја повикуваат и министерката за труд и социјална политика, Мила Царовска, да каже како оваа, како што велат, незаконски поставена в.д. директорка потпишуваше документи и каква одговорност имаат сите погоре посочени страни?