Илија Димовски, претставникот на ВМРО-ДПМНЕ во преговорите во Клубот на пратеници, без конкретен одговор дали неговата партија ќе го прифати предлогот на СДСМ, новинарите, невладините и новинарските здруженија да бидат дел од преговорите и го обвини СДСМ дека води дволична политика.
– Надвор велат дека ќе ги вклучат во преговорите, а внатре зборуваат друго, рече Димовски.
Тој рече дека ќе постапат така како што ќе се договорат политичките партии во Клубот на пратеници.
Димовски рече дека ВМРО-ДПМНЕ е категорично против предлозите на СДСМ зашто не сака да прифати цензура во медиумите без разлика од која партија доаѓа предлогот.
– Апсолутно не прифаќаме ниту еден предлог од која било партија, за жал добивме еден таков предлог за државата да има можност за регулација и цензура, за пристрасноста и објективноста за медиумите, тоа е минимална работа која што демократските држави ги разликува од државите каде што има диктатура. Мене ми е многу жал што еве цела една хајка и битка на СДСМ од 6-7 години, во кои зборуваа за слобода и демократија, се изложија со еден ваков срам и се изложија на еден ваков срам со нивниот пристап и нивните барања за партизација на Агенција и МРТВ и за воведување можност агенцијата да казнува со огромни казни, со забрана за вршење професија новинар,со забрана на дејност на правните лица и тоа врз база на оценка на квалитативни вредности во новинарството. Тоа за нас е неприфатливо и не сакаме да разговараме во тој правец, рече Димовски.
Според него, она што го предлага СДСМ е враќање 40 години наназад. ВМРО-ДПМНЕ е за саморегулација во медиумите, преку стандарди предложени од новинарската фела, либерализација на пазарот и воведување на високи стандарди од ЕУ.
ВМРО-ДПМНЕ дала предлог да се прифати кој било закон од 20 земји-членки на ЕУ и целосно да се преземе во македонското законодавство, а за советите на Агенцијата за медиуми и на МРТВ, партијата имала предлог да се прошири составот на овие тела. Меѓу другото да влезат и претставници на верските заедници.