Големи реакции во јавноста предизвикаа фотографиите и видеата од потопената црква „Св. Никола“ во Маврово, на кои се гледа група туристи како се качуваат директно на објектот, облечени во костими за капење.
Верскиот и културен споменик, кој поголем дел од годината се наоѓа под водите на Мавровското Езеро, според реакциите на граѓаните бил третиран како реквизит за забава.
Преку социјалните мрежи, локалното население и граѓани упатија јавен апел до Општина Маврово и Ростуше, Националниот парк, МВР и Комуналната инспекција за итна контрола на теренот и преземање соодветни мерки.
„Сите туристи се добредојдени, но мора да се почитуваат правилата на однесување и верските чувства“, порачуваат граѓаните.
Особено загрижувачко, според нив, е што со качувањето врз градбата постои ризик од дополнително оштетување на веќе нарушениот црковен објект.
Се бара надлежните институции да излезат на терен, да утврдат дали е предизвикана материјална штета и, доколку има основа, да ги санкционираат одговорните.
Граѓаните бараат и поставување јасни предупредувачки табли и правила за однесување, како и почести контроли и патроли во областа, со цел да се заштити еден од препознатливите културно-историски симболи на Маврово.