Координаторот на пратеничката група на СДСМ, Горан Сугарески обвини дека ВМРО-ДПМНЕ не сака никогаш да се одржи надзорната расправа бидејќи, како што рече, не сака јавноста да ја дознае вистината.
– Надзорната расправа мора да продолжи со работа. Обвинетиот Груевски и неговите послушници мора да се појават и да одговорат како се случи во 21. век да загинат најмалку 23 лица, меѓу кои и бебиња, поради немање канализација и неисчистени канали. Тие ќе мора да ги објаснат сите пропусти во нивното 10 годишно владеење, што однесоа и човечки животи, рече Сугарески.
Според него, на 11. декември Македонија ќе добие одговорни, чесни и ефикасни институции кои ќе се грижат за граѓаните, а не за сопствените џебови.
– Обвинетиот Никола Груевски и неговите послушници се исплашија од првата седница на Надзорната комисија за поплавите пред 11 дена, видоа дека вистината за нивната одговорност ќе исплива на површина, и од тогаш прават се за да не продолжи. Очекуваат дека ќе помине времето и ќе се распушти Парламентот, па ќе избегнат одговорност, рече Сугарески.
На обвинетиот Груевски, како и на Никола Тодоров, Коце Трајановски, Тони Трајковски, Михаил Цветков, Владо Мисајловски, Зоран Јолевски, Митко Чавков, Жарко Караџовски, Оливер Ромески, Шабан Салиу, Ромео Тренов, Сузана Салиу, да им биде јасно – се појавиле на надзорната или не, одговорност ќе има, рече координаторот на пратеничката група на СДСМ.
Александар Тодески